Вясну ў сядзібе М. К. Агінскага сустрэлі адкрыццём новай і асаблівай выставы карцін са шкла Аляксандра Зубрыцкага. На адкрыцці выставы прысутнічалі Барыс Цітовіч (сваяк і добры сябра аўтара) са сваёй жонкай.
На выставе прадстаўлены работы, якія з'яўляюцца вынікам больш чым 20-гадовай творчай працы ўрача i мастака. На жаль, сам аўтар У 2016 годзе адышоў з гэтага свету.
Дзякуючы незвычайнай тэхніцы, якая не мае аналагаў у сусветнай практыцы, карціны Аляксандра Зубрыцкага адсвечваюць у промнях святла незвычайным, як быццам незямным бляскам.
Аляксандр Зубрыцкі нарадзіўся ў 1932 годзе ў сям'і выхадцаў з Магілёўшчыны. Беларус, па спецыяльнасці ўрач-афтальмолаг, кандыдат медыцынскіх навук. Скончыў Мінскі дзяржаўны медыцынскі інстытут у 1956 годзе.
Пасля заканчэння медінстытута быў накіраваны на працу ў бальніцу Вілейкі, размешчанай на тэрыторыі былой Заходняй Беларусі. Там аўтар пазнаёміўся з калектывам урачоў і сярэдняга медыцынскага персаналу, якія атрымалі адукацыю ў Польшчы. Прафесіяналізм і культура палякаў, якія працавалі там, аказалі на маладога ўрача моцны ўплыў. За час трохгадовай сумеснай працы вывучыў польскую мову, бліжэй пазнаёміўся з цікавай і вельмі цяжкай гісторыяй Польшчы. Адначасова шмат цікавіўся месцамі на тэрыторыі былога Вялікага Княства Літоўскага, якія прадстаўляюць асаблівую гістарычную цікавасць.
На працягу апошніх 20-ці гадоў Аляксандр Зубрыцкі на сваіх карцінах-мазаіках, выкананых з каляровага шкла, увекавечыў фрагменты тых месцаў.
Пазнаёміцца з выставай “Віленскі каларыт” і здзейсніць віртуальнае падарожжа ў розныя куткі Заходняй Беларусі, Убачыць велічныя каталіцкія храмы, ацаніць іх прыгажосць і разнастайнасць можна будзе на працягу двух месяцаў у зімовай аранжарэі М. К. Агінскага.
Алеся ШУНЬКО, экскурсавод музея-сядзібы М. К. Агінскага.
Фота аўтара.
